Shiga masa景颇新闻

Kinma 25 ning hpring Naura yang manau

耿马25周年目瑙纵歌

时间:2018-03-09 10:54:38 来源:德宏团结报

  Kinma Sam amyu Wa amyu madu uphkang ginwang Jinghpo Wunpong amyu sha manau 25 ning hpring manau poi ninghtan hpung ko nna laksan so shaga dat ai hte maren, Sakhkung htunghking hpung ni, Sakhkung gata ginwang myu shagu hte Ninghkong Jaiwa buga Shadan Wa-long Maimai Hpuntai krung (Shadan krung) htunghking hpung ni 2018 ning shata 3 pro 1 ya shana hkying 9 e manit 49 hta Naura yang manau wang e htunghking madum nsen hte hkrak alum ala nga nna du hkrat wa sai.

  Ahkru yan ara shagong shana shata jan na-chying wa tu gala nington mai tsom la nga ai! Kinma buga Naura yang mare numshang e“Jinghpo Naura yang”nga ai mare bunghku chyinghka lam laika htoi gabrim ai gata, lam pai hkra lahkong maga go manau poi ninghtan salang ni hte manau poi shawa do tsa alum ala wuwu didi htunghking madum nsen hte htunghking mahkon manong hte ro nga, gabu hkanum krowang sindai ko nna gatu pru wa ai sumsai myiman hte hkap tau bop la nga la ma ai. Shingrai Sakhkung de nna du sa ai htunghking hpung masha ni mung, htunghking nbo nnyeng lit, hpunau matut rinhtu rinong, Shagong baunu, shi hkam baula, htunghking manau dumba dumbu ba-ja ni hte rau du shang wa mara ai. Manam tau htingnu dohta e Sakhkung mungdo htunghking hpung ni a nnyeng lit 4 hte Ninghkong jaiwa buga ni a nnyeng lit 4, Nshon htunghking hpung ni a nnyeng lit 2 hpe yu shadun ton nna shong ningnan e ndai lang na Sakhkung de nna du sa hkalum hpung woi wa du wa Htoi Man ko nna hkalum mungga shaga ngutai hte duwa Maran La ko nna hkap tau hkalum la ai mungga shaga nhtom Htoi man magun lit ap ai. Htunghking shat lit ap ngut ai hte Sakhkung htunghking hpung ni a poi masat kumhpa Shagong nu ap u ai.

  Matut nna Ninghkong jaiwa buga htunghking hpung Ningbo Lauban gaba Du Lahpai Brang Nu hpunau buga makyit mahkai lamang galo ai, shong ningnan ning rai hkrum lu ai gabu hkanum mungga shong shaga nna, htunghking nnyeng lit ap nna hpunau matut rinhtu ap ai, matut nna go hpunau pon ba shihkam baula ap ai, Lauban gaba du Lahpai Brang Nu hku nna htunghking madum sumhpa mari la na matu laksan Miwa gumhpro lap mun manga (50000) n-gun jo da u ai. Nshon Shuili ni mung htunghking mahkon lahkong ni sa kumhpa ma ai. Jahtum e du wa Maran La ko nna hkap bop la ai htunghking nnyeng lit 6 hpe Sakhkung de nna du sa ai hpunau ni hpe hkap hkalum la ai lam galo ai. Shingrai lahkong maga na hpunau ni htunghking htongka jom ka gabu ohlo ma ai.

  Ninghkong jaiwa buga htunghking hpung ni go laksan so shaga da ai re majo, htunghking nnyeng nbo shat lit hpe mung moi na htunghking hkringhtong ro galo bon gun nna, manau poi ten tup mung moi na htunghking hkringhtong sut manau hkrak nan woi manau nna Naura yang manau wang aten tup lak lai hkra gabu ai nam chyim sama hpring nga sai re. Shana go Ninghkong jaiwa buga nila sa ai htunghking yu-ngui mahkon ni hte htunghking ka hkrang hpe madu bu ni rau jom hkalum pyo la ma ai. Naubu shana de go poi madu ni ko nna htunghking lusha woi jom sha nna, shana go Naura yang buga na Salang Lahpai Gam nta jom pyo chyai nna manau poi hpungdim dat ma ai.