Shiga masa景颇新闻

Nshon ko Olosi shayi sha langai bai sa du ra ai, Yinnan dat sumla hkrung ko pyi shang sai

陇川又迎来了一位漂亮的俄罗斯姑娘,还上了云南卫视

时间:2018-01-12 10:04:04 来源:云南卫视

  Nlo amyu sha ni a kunghpan maka wa go, labau galu ai hte, masha hpe nwai shangun la ai hte rai nga ai. Ndai lang na 《Ngai sumtsan ga nna sa wa ai re》go Li Yin Kyin sumtsan manam Dan Li hpe woi nna Yinnan Nshon ga ko du sa nhtom, dai shara na amyu kunghpan maka sa chyam maram hkam sha yu ai rai nga ai.

  Nshon ngu ai go, Miwa mung a Sinnan dingda maga mung htingrep ko rai nga ai, ndai shara hta marang grung, jan mai tsom, gahtet shadang grung re majo, “Miwa mung manau buga” ngu ai shingteng mying mung lu nga ai.

  Yinnan Jinghpo wang gata hta go kawa maling e wang shinggrup ton nga ai ko, lamu pyi dep na zon re hpun gaba bai tu hpangu nga ai. Numshang hte manau shadung go Jinghpo amyu sha ni n-go htot yu wa ai labau, sharot zinghka hkrat wa ai kunghpan maka labau re ni shadan dan nga ai.

  Htunghking lu sha go grau nna alak mi she rai nga ai, hka-wan n lom, chyaugot n lom, hkoize n lom re hte rau, shat simai hpe langa hpo hte makai la ai hkrai rai nna, kawa kaihtum hta htu la ai maihtu bai lom rai nna yu dat yang aningtsing sha rai nna mu la na zon rai nga ai.

  Aga, gabu ai myit, gari ai ta, mano manang ni hpe tsa hkungga jo~~

  Jinghpo amyu ni go, Miwa mung nlo amyu sha ni ko na langai rai nga ai, madu a aga hte laika lu ai ni re, Yinnan mungdo gaba Sakhkung Sam Jinghpo amyu madu uphkng mungdo hta nga shanu ai re, Jinghpo amyu sha ni hta Jinghpo, zi, Lashi, Langwo, Balo ndai amyu hpan 5 nga nga ai. Amyu hpan a mying go amyu hpan shagu ni madu hpe shaga la ai mying hte amyu hpan a ga a mying mung rai nga ai. Dai ko “Jinghpo”ngu ai go myu hpan mying re ai hte rau amyu mying mung rai nga ai.

  Jinghpo amyu ni a buhpun go alak mi rai nna tsom la nga ai, Yin Kyin hte Dan Li go shachyen masha Lui Shi Mui hpun to nga ai Jinghpo htunghking bu hpun hpe grai nan yu ra yu sharong to nga masai hte maren, lawan wan hpun chyam yu na grai myit saku nga ma ai, bu hpun na go loi ai n rai nga ai, ahtik shagu hpun sumrat la ra ai hte maren, hkum hkra hpun sumli dat jang she, mana maka tsom htap na rai nga ai.

  Shan go Jinghpo amyu rida maka hkringhtong matut masha ni a nta ko sa du nna, da da ai sa yu nna Jingho amyu ni a rida hpaji hpe maram dinglik yu ma ai, dai hta n-ga Jinghpo buhpun lu shap la masai majo, grai nan gabu tolot nga masai.

  Tsom htap buhpun hta tsom htap ai sumrat shakya rai no shalom lang ra nga ai, Yin Kyin hte Dan Li go nang hpe Husa gumhpro rai no sa woi yu na rai nga ai.

  Jinghpo nhtu go Jinghpo amyu sha ni a galo lu galo sha ai hking rai re, majan gasat laknak re, Jinghpo shadang la ni a mon sumli rai re, Jinghpo amyu kunghpan maka ko na ahkyak dik ai masat kumla rai mung re.

  Jahtum lang hta shan lahkong hkrang n mu hpa-rat matut masha Shang Lau Sai a nta ko sa du masai, Husa nhtu dup bakka wa go dai shaloi jang mungkan hta dai dik ai nhtu gahtam chyam dan sai, galang ta hkonghkyen shui hka palin 26 gahtam di dan, hpa-jet 30 hpe galang ta numrat di dan, gang pa gahtam do dan rai na hkyem nga ai, shi go byin lu na rai kun?

  Jinghpo htunghking bu hpun mon sumli la sai Yin Kyin hte Dan Li go manau manau sharin na hkyem nga ma ai, shan sharin la ai hte yi chye ka manot wa na ma ai kun?

  《Ngai sumtsan ga nna sa wa ai re》go Yinnan dat sumla hkrung dap ni n-gun gaba dat nna dem lajang la ai pogram re, mungdan hta nambat langai ngu na maigan mung hte matut nna galo ai buhkom let chyam dinglik yu hkom ai pogram myu hpan rai nga ai.《Ngai sumtsan ga nna sa wa ai re》go shata 9 nhtoi 30 ya shani Yinnan dat sumla hkrung hta bang dan na hku rai sai. Chye lu yang, pogram ndai go ya yang na buhkom pogram a hkrang masa ko n hkan ai sha, maigan masha num hte la marai lahkong hpe manam ding yang tai shangun nhtom, Yinnan ga na bu hkom shara shagu ni hta, shara buga na masha langai so la nna, manam ni hpe shara magup woi sha hkom, yup ra woi madun ya hkom, woi sa, woi hkom chyai, woi mari hkom, woi pyo chyai hkom shangun rai nhtom, Yinnan ga na nga sat nga sa lam majing ni hpe hkan chyam dinglik yu shangun ai re.

  Shing rai nna, ningnan sing re ladat hte, maigan masha ni a yu jasat hte, bu hkom chyai let Miwa mung na nga sat nga sa lam ni hpe sa chyam maram dinglik yu na hku rai nga ai.