Shiga masa景颇新闻

Lasi hkai ladat(6)

种豆方法(6)

时间:2017-08-11 09:35:52 来源:德宏团结报

  Sanshiwanchun hpe go tan shadang hpyihpyiemu 0.1 di pau la nna, apu nnan pu wa ai ten yi kunghkyin mi hta kungkyin 300 daram gat bun na, dai hpang apu pu an ai ten yi kunghkyin mi hta kungkyin 600 daram bai gat bun na, ndai bo tsi lu gat yang lasi 6%~13% daram lu la jat nga ai. Grai gaja ai yi hkan go, lasi hpun nau gaja nna apu hkrat, lasi kop yat hkrat mat re majo, lasi pru shadang grai yom mat chye ai, ndai zon re yi ko go aijongsu bang ra ai, ndai bo tsi hpe apu nnan pu wa ai ten yi kunghkyin mi hta 0.125% re ai aijongsu kungkyin 455 daram gat bun ra ai, shaloi lasi 10%~20% daram lu la jat ai, lasi hpun apa mat chye ai yi hta gat jang mung lasi 40% a lahta de lu la jat ai, lasi hpun chye galeng mat ai hkan go yi kunghkyin mi hta esanwu gang sandenben gyason kungkyin 0.045~0.07 daram ko hka kungkyin 375~700 daram pau bang na, shing rai apu nnan pu wa ai ko nna apu pu an ai laman hta alap ko gat bun tim mai ai, tsi ndai ni hpe go shi a shadon shadang hte tup tup di lang ra ai.

  Shingtai ana htang maja sat shamyit kau na lam. Lasi hpe shaza ai shingtai ana go myu 30 jan nga ai, shingtai ana ndai ni go lasi lap, lasi kop, lasi hpun hkinlang hte lasi ru ni hta lo chye byin ai.

  Alap ko chye byin ai ana go grai lo ai. Ga shadon: Shongmui ana. Ndai bo ana byin jang lasi lap htoi htoi tsit tsit rai nna ateng apang chye rai ai, lamu mung shing n rai marang htu jang lap gata maga de numshu lamu chye tu wa ai. Shubyin ana. Ndai bo ana byin jang alap ko nhkren sha ai zon ateng apang rai ai, laja ai rai jang alap kyip mat nna yat hkrat mat chye ai. Lap mut ana. Ndai bo ana a masa go alap ga-ang ko mut mut rai nna, makau ko go chyang chyang rai ai, ndai bo ana go lasi kop ko mung no chye byin ai. Heban ana(褐斑病). Ndai bo ana go apye apye rai chye byin ai, laja ai rai jang alap yat hkrat mat chye ai, ndai ni hta lai nna alap ko chye byin ai ana go lap ka ana(叶斑病), lap chyang ana(黑斑 病), befun ana(白粉病) re ni mung no rai nga ai. Lasi kop ko lo chye byin ai ana go chyimui ana(赤霉病), htangyi ana(炭疽病), lunwun ana(轮纹病) re ni rai nga ai. Chimui ana go lasi bong hte asi ko lo chye byin ai, alap matu ko mang mang rai byin wa nna chye yat hko si mat ai, asi ko go hpro hpro re numshu lamu chye tu wa ai. Htangyi ana go lasi hpun hkinlang ko lo chye byin nna machyit marut rai ai. Lunwun ana byin jang go alap ko ateng apang rai nna alap chkye hkro si mat ai, asi mung hkak hkak rai mat ai.

  Lasi ru hte lasi hpun hkinlang ko lo chye byin ai ana mung tsomra lo ai. Ga shadon: Gyinhe ana(菌核病) byin jang go lasi hpun apo ko chye yat chyang mat ai. Lihku ana(立枯病) go lasi hpun pot ko jahten nna lasi hpun chye so dung mat ai. Cadau ana(猝 倒病) byin jang go maku hten darung mat chye ai. Banden ana(斑点病) go alap ko apye apye rai jut magup hku chye bra wa ai, lasi tum ko go chyang chyang rai yat wa chye ai. Banjin ana(斑疹病) byin jang go alap ko nsam htoi htoi tsit tsit rai nna, laja ai rai jang alap chye hkro si mat ai. Dadufaye byindu ana(大豆花叶病病毒) go kumla amyu myu hku nna chye byin ai: Alap ko ateng apang rai nna htoi htoi rai ganyung wa ai hpang, loi chyang chyang rai hkro si mat chye ai; Matsun mut mut rai na-ga mat nna gaungui rai hkro si mat chye ai; Alap kyip kyip rai nna lasi hpun n chye gaba mat rai ai, ndai bo ana go lasi kop ko mung no chye byin nga ai; Alap abong achyong chyang chyang chyang rai nna, alap gataq maga de chye hkayom mat ai; Ndai bo ana byin sai lasi hpun go chyana mat nna, asi nau n si mat ai. Senchung ana byin ai lasi hpun go gaji gajo re aru grai lo nna, aru ko shingtai tsip tsip ai, ndai bo ana byin sai lasi hpun go htoi htoi rai hkro si mat chye ai. Lasi hpun ko tu gayop nang ai htusizi (菟丝子) ana tsing go lasi hpuhka namshum ni marop la kau ya nhtom, lasi hpun chye hkro si mat ai.

  Lasi hpun hpe sha shaza ai shingtai go daduya shingtai(大豆虫) hte dushisin shingtai(豆食心虫) rai nga ai. Daduya shingtai go ahkalung sha re lasi lap grai chye sha ai, ndai bo shingtai sha sai lasi hpun go tingri tngra rai alap na-ga mat nna run hkrat lawan, lakying n chye kying mat, asi nau n si mat rai ai. Dushisin shingtai go lasi kop, lasi tum re ni lo chye sha ai.