Shiga masa景颇新闻

Dum ninghkring Dauba La hpe nang yi chye nta?

你认识有孔就能吹的景颇族演奏家导拔腊吗?

时间:2017-05-06 10:07:48 来源:德宏团结报

  Dauba La ba-ja dum nga ai.

  Madum sumhpa bohpan lo wa chye dum ai Dauba La go, 1959 ning hta Yin- kyang ginwang Htaihpyin gat mare Lung hpum mare salang rapdo Lok lahkong na Maji Dauba nta hta sa pra wa sai. Shi go gaji ko nna mahkon mangui sharong ong ai wa rai nna, Wunpong sumpyi grai dum sharong u ai. Shi jong sa ai shaloi mi rai rai, nga rem hkom ai shaloi mi rai rai, shi a sumpyi hpe n tat ai gun dum hkom u ai. Galoi mung sumpyi hkrai dum sham mat mat re nga yang, bungli hprai ai mung lan lak rai nna, ganu gawa ni daru hpyit ai hkrai hkrum sha u ai.

  Lunghpum mare salang rapdo hta go Jinghpo, Miwa, Lisu ni jom nga shangu nga ai, dai shara na amyu shagu shawa masha ni go mahkon mangui madun sumpyi ni grai sharong ma ai. Dauba La no gaji ai shaloi ko nna shanhte gahtong na ginsup hpung ko lom nhtom, sumpyi dum ai hte, mahkon hkon ai hte, ginsup ka ai hte rai u ai. Dai shaloi yang atsom shaman la lu sai re nga yang, Dauba La a dum hpaji madang go lani hte lani tso mat wa sai, ginsup hpung ni shara magup ginsup pya dan hkom ai shaloi, shi dum ai Wunpong sumpyi nsen hpe yong yong e na ra na sharong ya nga ai.

  1978 ning hta, Mungdo ginsup hpung ningbo ni Dauba La hpe mu hkrup nna, mungdo ginsup hpung de shaga woi la masai. Ginsup hpung ko shang ai hpang, Dauba La go mahkon mangui hta myit majung grau jung mat nna, mahkon mangui hpaji mana maka sharin hka-ja la lu nu ai. Not not e, Dauba La go, shi sumpyi sha dum nna Jinghpo amyu sha ni a mahkon mangui ni hpe aihkrak ngu n lu dum shangui shapyo sharot zinghka hkrat wa lu ai lam hpe mu chye maram shapro sai hte maren, gaga bohpan madum sumhpa ni bai dum shapyo dinglik bang wa nu ai. 1988 ning ko nna, shi go ba-ja, larung sumhkran, pyilang, hturen, pyiman, pyisun, apau, taubasi sumpyi, magri sumpyi gaji gaba, sa-hkesi, sumpyi galu re dum hpa dum sharin hka-ja mat wa ai rai yang, shi hkrak chye dum shapyo lu ai go bo 13 du nga ai.

  Dauba La go Lau mung, Moloko mung, Myen mung, Yudiya mung re mungdan ni hta dum pya hkom yu sai.

  Ya, Dauba La bungli hkring sa ai aten 8 ning du mat wa sai, rai yang grau kyin mat sai, hpa rai kyin a ni nga yang, madum sumhpa dum sharin sara tai nna kyin ai re. Jinghpo amyu sha ni a mahkon mangui ni hpe sharot zinghka mat wa na go Dauba La a myit mada lam rai nga ai. Mahkon mangui ra sharong ai masha ni hpe mu hkrup jang, shi go shanhte hpe Jinghpo mahkon mangui atsom sha sharin la na hku hkrai shadum jahprang u ai. Shi ko madum hpaji sa sharin la mayu ai masha nga jang, shi go gade kyin tim aten sho nna sharin ya ya rai u ai, kyin ai lo n rau ai lo nga nna ningdang kau ai lam n nga yu u ai. Bungli hkring sa ai hpang, Dauba La go ginwang myu shagu hkan larung sumhkran, ba-ja, hturen, taubasi sumpyi re ni sa dum sharin, nuk hpaji ni sa sharin ya rai nga ai, shi a myit mada lam go, grau lo ai masha ni hpe Jinghpo madum sumhpa chye dum shangun na ngu ai rai nga ai. Mangshi ba-ja hpung na ba-ja dum masha ni go, shi grai myit dik dum ai jongma ni rai nga ma ai.

  Ya yang hta, Dauba La go, Jinghpo madum sumhpa hte seng ai laika buk mi lu shapro na hpe grai myit mada nga u ai.