Hpungtang hpaji ginra景颇科普

Lata gindun let ana zinli maja, hkamja lam makop maga

手抗疫防痨 守护健康呼吸

时间:2020-04-03 08:42:16 来源:德宏团结报

  Ya ten hta sinwop ana nnan htang maja ai masa grai gaja wa sai hte rau, mayen hku nna hkron kap wa chye ai nsa lam ana —Fuigyehe sinwop ana (肺结核) go, masha a hkamja lam bai jahten shaza hkra ya wa nga ai. Ya lawu de ana ndai hte seng ai hpaji ni tsun dan na.

  Nhpa hpe gyehe ana nga ma ta?

  Gyehe ana go gyehe kan-gyin ana ganu ni masha hkum hkrang gata de shanyen shang wa ai hpang laja lana rai shinggyim masha ni a hkamja lam hpe jahten shaza hkra ya wa ai hkron kap ana hpe ngu ai re. Jau ko nna mu hkrup nna, jo ang ai hku tsi lajang la lu yang go, asan sha mai mat lu nga ai. Gyehe kan-gyin ana ganu masha a hkum gata na ahkrang amyu myu de sha- nyen shang jang go, kro hkrang shagu hta ana ndai bo byin wa chye nga ai, raitim ndai bo ana go nsa lam hku nna sha hkron kap lu nga ai, shing re majo, masha hkum hta gyehe ana ganu jahkron shakap la jang go sinwop hta byin ai lo malo re.

  Gahti ai shaloi mong pru wa ai mayen ni hta ana ganu ndai bo rong ai, dai majo jahkru kumla rong ai masha go gyehe ana shakap ai madung ni re. Hkumhkrang hkamja ai masha ni hta go gyehe ana kap yak nga ai, ana ndai bo byin wa n byin wa go ana htang n-gun ja n ja hta seng nga ai.

  Fuigyehe sinwop ana a kumla ma- dung go gara hte re ta?

  Hkum ting na kumla: Hkum ting n nga pyo wa, puba, n-gun n rong, gahtet. Machyi masha lo malo go loi gahtet shing nrai shana de gahtet wa. Salat pru: Lo malo ni go yup tung yup hko shing nrai jahpot manap e, machyi masha ni dum hprang wa ai shaloi pu hpun palong ni madi mat. N-gup n mu, lasi lamun, hkum namnak yom mat wa rai nga ai.

  Nsa lam kumla: Jahkru, mahka pru re ni go fuigyehe sinwop ana nnan byin wa yang nong e mu ga ai machyi kumla re, nnan do e go loi sha jahkru nna, mahka gumchya loi sha rong rai nna, machyi masha lo malo ni nau n maja nga ai, awo wo, nsa lam ana re zon sha non kau nga ai, machyi ai lani hte lani laja wa jang go, mahka lo wa, hpro nsam shing nrai na htoi nsam re mahka gumchya lo wa pru wa sai. Sai jahkru shapro, mahka ko sai lom, sinda chyat, sinda machyi , nsa sa yak wa rai nga ai.

  Jahkru ai aten bat 2 a lahta de rai nna,sai jahkru shapro, mahka ko sai lom nna, bai gahtet rai jang go, madu gyehe sinwop ana lu sai nhten ngu myit la ra sai, tsirung de lawan sa jep yu ra sai.

  Mungdan ko nna tsi jahpu n hta ai sha tsi lajang ya na tara nga ai.

  Sakhkung mungdo namtsi rung hte Mangshi shawa tsirung go Mangshi gyehe ana tsi tsi ya na hku masat da ai tsi rung re.Machyi ana ndai lu ai ni mai sa jep yu ai.Tsirung ndai lahkong ko jahpu manu n la ai sinda ko X jak hte galang dem ya, mahka galang hkap jep ya ma ai.

  Fuigyehe sinwop ana go tsi shamai lu nga ai.

  Ana ndai bo go tsi shamai lu ai, raiyang asuya ni hpo ai tsirung ko sa tsi ra ai. Tsi tsi aten go shata 6-8 daram rai ra ai, atsi hpe aten hte hkrak sha ai ni go 85% tsepkop mai lu ai. Lama atsom n sha ai ni go nining daram tsi ra nga ai, tsi jahpu mung 30000 hte 50000 jan lang ra ai

  Fuigyehe sinwop ana hpe gara hku htang maja na re ta?

  Nta nhku ko nbung nsa jahkrang na. Madu hkum a san seng lam galo du na, gashin gamun lang rai ni laksan masat da, lata gashin shaja, bu hpun palong galai shaja, aten masat ton nna ana ganu sat rai na. Jahkru, gahti ai shaloi maisau hte ladi magap kau na. Hkumhkrang shaman sha- kyang shaja na, nga pra alai ni htap htuk na, lusha grung grung sha, hkru hkru yup na, myit shalan chye ra ai. (Gale ai Nhkum Bok)