Hpungtang hpaji ginra景颇科普

Luihkri hkai sha hpaji

种植柠檬方法

时间:2018-11-01 11:50:04 来源:德宏团结报

  (Shata 10 nhtoi 31 ya na do)

  Yi-nam lado hta ku wa ai maku hpe rep gadun kau na ladat: Asi n si nna grai gaja ai hpun hpe go, yi-nam lado hta ku wa ai maku hpe rep gadun kau rai ai, shing rai mangai lado hta maku lo lo bai ku jat shangun nna, lakying nnan ni namshum marop ai lam sharai ya na. Namshum marop ai lam sharai ya lu jang she apu pu nna asi si wa chye ai. Ndai lam hpe shata 6 shagong do ko nna shata 7 pro laman hta galo yang grau mai nga ai, hpun ndung lahta de mida laman 30 daram galu ai hpun lakying hpe 1/2 daram rep lajang kau na. Ndai aten hta Tan, Lin re namhpun dat bang nna shata 7 si ko nna shata 9 pro laman hta mangai maku ku shangun na. Maren mara sha rai gaba wa ai yi-nam lakying hte gyit noi ton nna gaba wa ai yi-nam maku ni hpe go n rep ai sha madat ton na. Rep lajang ai aten htaphtuk ra ai, nau jau mat jang mangai lado si hta she maku ku wa nna apu pu asi si na lam hta grai wa-hkye hkra nga ai; Nau bai hpang hkrat mat ai ko nau hkunhkro rai jang go, mangai lado hta lakying kying jat na matu grai yak mat nga ai.

  Ahka sharam na ladat: Shata 9-11 laman hta ahka mase kau na mu galo gaja ra ai, ndai laman hta aga hpe loi hkunhkro na hku galo ton na (Alap sha n kyip jang rai sai), ndai hku lu galo jang apu grai pran loi nga ai.

  Ahpun hpe gadoi gawan nna apu lawan pu shangun na ladat: Ndai bo ladat go apu lawan pu shangun na ladat gaja re. Ta tut galo sa wa ai kasi machyim ko nna chye la lu yang, gadoi gawan ai hpun go gaga hpun ni hte shabung dat yu yang, apu pu ai lam htam gade she lo jat nga ai. Gadoi gawan nna apu pu shangun ai galo ladat: Shata 12 pro laman hte shagong do hta, gahtet gatsi shadang gaungui rai nyem mat wa sai majo, ahpun sha tu tsom ai rai nna, bum polo ga hkye yi hte hkarang yi hta rai jang go aru sung ai majo, ndai bo ladat lang yang grai mai ai. Abong htot hkai ton ai hpang 2-3 ning laman na hpun gaji rai jang go hpunmat hpe gadoi gawan na, htot hkai ton ai 4 ning a lahta de na hpun gaji rai jang go hpun lakying madung hpe gadoi gawan na, shing n rai gadoi gawan ai abat shadang a 70%-80% daram hku gadoi gawan na. Hpun lakying madung hpe gadoi gawan yang, loi gaji ai lakying gasha langai hpe n gadoi ai sha madat ton na, shing rai apot do hpe namshum dingyang htok ya lu na hku galo ra ai, shaloi she aru ni mung namshum atsom lu marop la nga ai; Lahta na shadon shadang hta lai jan hkra gadoi gawan kau jang, ahpun a tu masa n byin mat nna, alap grai run hkrat mat chye ai. Gumhpon nna tsun ga nga yang, gadoi gawan ladat lang yang ahkying aten hte hpun masa hpe yu ra nga ai, tu masa gaja ai hpe go loi lo hkra mai gadoi gawan ai, tu masa n byin ai hpe go nau lo hkra n mai gadoi gawan ai. Gadoi gawan na lang rai go dat nhtu shing n rai n lang mat sai hpri gang zingret hpe garang shatai la nna ninghku shachyo bang rai mai lang nga ai, shing rai hpunhpyi grau manyen tsom ai yang gadoi gawan na, ahpyi hpe ret di nna hpunshan hpe loi ret hkra jang rai sai. Gadoi gawan ai 15-20 ya daram a hpang, alap a nsam lai wa jang go apu mung pu wa ra ai.

  7.Apu hte asi hpe makop na ladat

  Luihkri hpun hpe htingra lado hta apu pu shangun nna yi-nam lado hta asi si shangun yang grai mai nga ai, htingra lado hta go asi si shadang 2% daram sha lu du nga ai, grau si hkra raitim asi si shadang 7% daram ko nna n lu si jat sai, apu lo malong go asi n chye si mat nga ai. Dai majo apu hte asi hpe makop na lam grai ahkyak ai. Gumhpon nna tsun ga nga jang, apu hte asi hpe makop na matu, lawu na ladat hku mai galo sa wa nga ai: (Bai matut hti ga)Gale ai Zinghtung Ma Sam