Hpungtang hpaji ginra景颇科普

Shanzin hpan wa yo shapro ladat

养好肥猪方法

时间:2017-12-22 10:25:30 来源:德宏团结报

  (Shata 12 nhtoi 20 ya na do)

  Wamat mat sai wa ganu hpe atsom rem makop ra ai. Wamat mat sai wa ganu hpe go lawu na lam 3 hku nna gon lajang ra ai: 1. Hkritung na wa gasha ni gaba wa na htung lai chye ton ra ai. Wa ganu ni nli shalun la ai hpang, mayat no go wa ganu a mayat hkrang hku nna pajat de shang wa nhtom mayat ganu hte chye wa pong gayep mat ai, dai hpang ko nna go wa gasha gaungui rai byin tai wa sai. Nli shalun ai hpang 17~18 ya daram ko nna go wa gasha haumyi 5 daram galu sai, ndai aten hta abo, salum, asin re ni byin tai wa sai, 19 ya daram hta wa gasha haumyi 7.5 daram galu sai, ndai aten hta shong lago hte hpang lago byin tai wa lu sai. 24 ya daram hta go wa gasha haumyi 15 daram galu sai, ndai aten hta myi, ladi, ana re ni asan bra bra mu lu sai, ndai aten hta nau n kung ai wa gasha ni go chye si hkrat mat ai. 28 ya daram rai jang go wa gasha ni haumyi 15~20 daram galu nna hke 2 daram rong sai, ndai aten hta ahkrang dan pra nna myi-mun ni mung tu wa sai, ndai aten hta wa gasha ni grai gaba lawan wa sai. 35 ya daram rai jang wa gasha a lago ni asan rai garan pru wa lu sai. 56 ya daram rai jang haumyi 90~100 daram galu sai. 60 ya daram rai jang go namnak hke 110 daram du nna gaba jat dingyang no rai nga ai, ndai aten hta wa-shat atsom nlu yo jang wa gasha si mat chye ai. 90 ya daram rai jang hke 500 daram du nna galu de haumyi 150 daram du sai. 114 ya daram rai jang go wa gasha woi sai. 2. Wamat mat sai wa ganu hpe atsom yo lajang ra ai. Ndai aten hta wa ganu ni nau hpum mat jang wa gasha ni a matu akyu nau n nga ai, dai majo wamat nnan mat wa ai aten hta wa-shat ko akyu namshum nau n mai bang shalo ai hta n-ga, wa-shat gatsing lo lo jo ra ai. Ndai aten hta wa gasha ni a hkum hta wuileng yensu, wuisinsu, angyison re ni grai ra gadon ai majo wa ganu ni a wa-shat ko ndai bo tsi jahkai loi bang jo ra ai. Wamat mat sai wa ganu hpe go ladat myu 2 hku nna mai yo lajang ai: Myu mi go wamat nnan mat wa ai ten hta akyu namshum loi shau ai bo wa-shat yo nna, hpang hkan go akyu namshum lo rong ai bo wa-shat bai yo na. Bai myu mi go wamat mat wa ai 20 ya laman hta akyu namshum lo rong ai bo wa-shat yo nna, hpang hkan go akyu namshum nau n rong ai bo wa-shat bai yo na, wa gasha lau woi na rai jang akyu namshum lo rong ai wa-shat bai galai yo na. Wamat nnan mat wa ai rai nna hkamja ai wa ganu hpe lani mi hta akyu namshum wa-shat kungkyin 2.2~2.3 daram yo nna namlap wa-shat lo yo na, hpang hkan go wa ganu langai mi hpe lani mi hta akyu namshum wa-shat kungkyin 2.5 daram yo nna namlap wa-shat loi shau sha di bai yo na. Wamat nnan mat wa ai rai nna nau n hkamja ai wa ganu ni hpe go, akyu namshum lo rong ai bo wa-shat shong yo na, dai hpang akyu namshum nau n rong ai wa-shat bai yo na, wa gasha lau woi na shong hkan go akyu namshum grau lo ai bo wa-shat bai galai yo na. Wa gasha woi na shong 20 ya daram hta go wa gasha ni grau gaba lawan ai majo, akyu namshum lo rong ai bo wa-shat yo ra ai hta n-ga, wusinsu A, wuisinsu B, wuisinsu E, Gai Lin Mung( 锰), hpri jahkai, Den(碘), Jifang(脂肪) re ni loi bang jo ra ai.

(Bai matut hti ga) (Gale ai Zinghtung Ma Sam)