Hpungtang hpaji ginra景颇科普

Shanzin hpan wa yo shapro ladat

养好肥猪方法

时间:2017-12-20 15:27:11 来源:德宏团结报

  (Shata 12 nhtoi 15 na do)

  Magam hkrang gaba hku yo ai shara hkan go yangsanyen zagyau ladat lo lang ma ai, ndai bo ladat go Changbe wa la hte Dabe wa ganu hpe shong jahpre la na, ndai hku jahpre la ai wa ganu hte Dulohke wa la hpe bai jahpre la na, ndai hku jahpre la ai wa go wa-shat sha tsom, gaba lawan re hta n-ga shanzin mung grau lo nga ai.

  Wa ganu ni mayat gatu wa ai hpe yu maram nna nli gaja lawan tam shalun ya ra ai. Wa yo yang go wa gasha shong lo lo mayat jat la yang she ja gumhpro grau lu tam jat la nga ai, wa ganu hpe wa gasha lo mayat jat shangun na matu, nli gaja tam shalun ya na amu shong galo gaja ra ai. Nli gaja tam shalun ya na matu lawu na lam 3 hku galo ra ai: Lam mi go wa pra ganu ni hpe shong nnan lang nli shalun ya na asak chye ra ai. Wa pra ganu ni hpe go nli nau jau shalun kau yang mung n mai nna, nli shalun ai aten nau hpang hkrat yang mung n mai ai. Mayu e go wa pra ganu ni mayat gatu ai nambat 3 lang ngu na shaloi tam shalun ya yang grau hkrak ai, wa ni a asak ko nna yu yang, shara nkau hkan go wa gaba galon lawan ai majo shata 6~7 daram gaba jang nli mai tam shalun ya sai, Changbe wa hte Dabe wa hpe go shata 7~8 daram gaba nna kungkyin 100 a lahta de du jang tam tam shalun ya ai. Lam lahkong ngu na go wa ganu ni mayat gatu wa ai lam hpe chye yu maram ra ai. Wa ganu ni go nhtoi 21 ya daram din nna mayat galang chye gatu wa ai, la-ma wamat garai n mat ai rai jang mung lado n lata ai nhtoi 21 ya daram din jang mayat galang mi gatu wa wa chye rai ai. Mayat gatu ai wa ganu go nga n zim, wa-shat n kam sha, wa manang ni ko hkan jon mara wa, shing n rai wa manang ni e jon mara ya na ra chye rai ai, mayat hkrang mung bum hkye nna hpro hpro re mayat ntsin chye pru ai, masa ndai ni go nau n dandong ai majo atsom yu maram ra ai; Lam masum ngu na go mayat ntsin pru ai aten hta hkan nna nli tam shalun ya ra ai. Wa ganu go mayat gatu wa ai hpang hkying hkum 24~36 daram ko nna mayat nstin pru wa sai, ndai aten hta nli tam shalun ya yang grau mai ai. Magam hkrang gaba hku yo rem ai shara hkan go masha nan wa la a mayat no htu sho la nna nli shalun ya ma ai, ndai bo ladat go wa ganu ni mayat gatu ai aten laman langai mi hta hkying hkum 8~12 daram gang nna 2 lang htu ya ra ai. (Bai matut hti ga) (Gale ai Zinghtung Ma Sam)