Hpungtang hpaji ginra景颇科普

NINGTUK RAI LU SHA WA AI NPOT NHPANG

吸毒的伤害

时间:2017-12-20 11:00:13 来源:德宏团结报

  1. Madu hta hkan nna ningtuk rai lu sha wa ai npot nhpang

  “Ningtuk rai galang mi lu sha shut jang prat tup don yak ai.”ga hko ndai go galang mi lu sha shut jang, gahtap nna don don rai tim zeng sha n lu don ai ngu tsun mayu ai re. Dai majo, prat tup ka-na hte tsan gang na matu go galang mi pyi n mai gajam chyam yu nga ai. Dai rai yang, nambat langai lang ningtut rai gajam mayu wa ai npot nhpang go gara hte re ta? Ndai lam hpe chye lu jang, ningtuk rai hpe koi gam kau lu nga ai.

  (1) Ningnan ningtuk rai hpe n chye ai

  Masha nkau, hpa bo go ningtuk rai re n chye ai hta n-ga, ningtuk rai jahten shaza chye ai lam hpe mung n chye re majo ningtuk rai lu sha wa ma ai. Grau nna go, Pyindu ningtuk rai, Yauhtuwan re ningnan ningtuk rai (Ka-la ningtuk rai) ni hpe masha lo malo ni garai n chye lu nga ma ai. Masha nkau chyahtam go, dai hpe ningtuk rai n shadu, lu sha dat yang ayin rong wa nna madu a hkumhkrang hpe jahten shaza wa ai lam n chye ma ai. Dai majo, mahkon ginsup pyo chyai re shara hkan, masha wanong hku nna ningnan ningtuk rai jom lu sha ai lam grau na-du wa nna, ningnan ningtuk rai lu sha ai masha wahpung grau lo wa nga ai. Shanhte go ka-ni hpro lu sha ai ni hte grai n bung nga ma ai, hpaji madang loi tso, ja gumhpro sut su re masha lo nga ai hta n-ga, ram ma ni grau lo nga ma ai.

  (2) Mau ai myit hte chyam mayu ai myit

  Ramma ni go mau myit grau rong ai, hpa hpe mung mau nna chye la mayu ma ai. Ramma ni mahkrum madup yom ai majo, madu n galo yu ai mu hpe grai sa galo chyam mayu nga ma ai. La-ma, shanhte a ning re myit hpe n lu shadip, gaja lam de n lu shayon la rai jang go, ningtuk rai lu sha ai n gaja lam de hkom sa mat wa chye ma ai. Ningtuk rai lu shakap ai ramma lo malo ni hpe jep yu yang chye lu ai go, masha lo malo ni ningtuk rai hpe mau nna chyam yu ai nga yang ayin lu sha shakap la ai hkrai rai ma ai.

  (3) Ningtuk rai go ayin lu wa ai bo re hpe nau n kam, tinang madu hpe nau kam dinglai

  Ningtuk rai lu sha ai masha lo malo ni, tinang nambat langai lang lu sha ai shong e go ningtuk rai n gaja ai hpe chye ai raitim, madu nan madu hpe nau kam dinglai, tinang ayin shakap la tim lu don kau na shadu ai majo ningtuk rai lu chyam ai rai ma ai. Nkau go, madu a nta masha ningtuk n lu don ai majo, dai ningtuk n lu don ai ni hpe kasi galo dan na matu, madu bai lu yu ai nga yang bai gadong bang mat ma ai.

  (4) Pyo dinglai ai hte ningtuk rai lu sha ai hpe arong la

  Ning re masha go nau n lo ai. Raitim, prat dep lam shachyut, arong mala, mano manang ni e hpang hkrat ai ngu, myit n hpro ai ngu na tsang ai masha mung nga ma ai. Ndai zon e masha ni go, ningtuk rai lu sha masha ni hte ningtuk rai dut masha ni hkalau ai hkrum jang, n yak ai sha ningtuk rai lu sha shakap la nna, tinang a manu dan ai prat hte tsom htap ai hkum gong hpe jasum kau sai.

  (5) Myit hkam sharang n-gun kya, ruyak jamjau hkrum jang ningtuk rai hte myit shapyo

  Masha a prat mi hta myu magup re ruyak jamjau hte myitru myityak lam chye hkrum gadup nga ai. Rai yang,myit machyi lam tsun shapro dan kau na masha n mu tam rai nna, madu a kro hta bang ton nna madu hkrai hkam sha yak ai masha nga ai. Kro hta bang ton ai nau lo, madu a myit hta n lu hkam sharang mat jang, myu magup re ladat hte myit shabran la chye nga ai. Ningtuk rai lusha ai go njo ai myit shalan ladat langai mi re. Ramma ni go hkum gong hte myit ni rot gaba kung wa ten rai nna, hpaji sharin myit lit li, mano manang ni hte ganing rai ganon mazum na hpe mung bai myit pu re hta n-ga, hkum kunglot wa ai shaloi gaju galim nga ai myit chye pru ai majo, jamjau jamhko myit ru myit yak ai lam byin chye ma ai. La-ma wa, ndai ten hta asong hkalau ai hkrum jang, ningtuk rai hta gadong bang mat na loi dik nga ma ai. Dai hta lai nna, hpong shingra de ningnan shang wa ai ramma ni go, bungli gata mat, sumtso sumra lam hten run mat, bungli sum mat re amu pru jang mung, ningtuk rai lu sha nna madu a myit shapyo la chye ma ai.