Hpungtang hpaji ginra景颇科普

Udi grai di ai bo u rem na ladat

养鸡方法

时间:2017-12-04 15:55:18 来源:德宏团结报

  (Shata 11 nhtoi 29 na do)

  Mayu e go 10 ya daram re shaloi ana htang tsi galang mi htu ya na, 30 ya daram re hpe go ladi hte myi ko Esiyimyau(二西疫 苗) gahte bang ya na. U nampan lo chye byin ai lado hta go u nampan htang tsi mung no htu ton ya ra ai. U nampan htang na ladat go, shingko gata u mun n tu ai yang pongtin hte u nampan htang tsi gahtok la nna 1~2 lang achyo wo ya na. Laban bat mi a hpang bai rim jep yu yang, gyi-ku n kap jang lahta na ladat hku galang mi bai achyo wo ya ra ai, 3 ya re uhkai hkalung hpe go u donggat htang tsi jo ra ai, tsi go ushat yo shadang a 3/ 10000 re ai likelinfun(立克林粉) ushat ko gayau bang nna laban bat mi daram yo na, hkyuchung shingtai hpe htang na matu 3/ 10000 re ai funbenga(粉苯瓜), shing n rai hkyuchunglinfun gayau bang nna matut manoi 20 ya daram bai yo na. Ndai bo u go nau malu ai nga yang ushat n hkring ai lu hta sha ma ai, dai majo 6~7 ya daram gaba jang u shakap rep di kau ya ra ai, rep di ai shaloi, ntsa shakap hpe 2/3 daram rep di kau nna, lawu shakap hpe go 1/3 daram rep di kau na. Uhkai ten hta go grau ku ra grau rem yak ai aten rai nga ai, raitim, atsom rem makop nna ana htang ton jang hpa n ra ai, ana htang maja na matu tsi htu tsi jo ra ai hta lai nna, ana kap wa na npot hpe mung no pat shingdang kau ra ai. Dai u yo masha ni a bu hpun palong gyepdin re ni ko mung ana ganu chye kap nang nga ai, ulong shang sa na rai jang, ta gashin kau, mu shang palong galai hpun kau rai ra ai.

  Udi di sai u ganu ni hpe gon lajang na lam. Upra ni hpe udi di shangun ai ulong de rim bang na shong e, ulong asan awan gashin kau nna ana sat lajang kau ai hpang, ushat wa-ka, hka wa-ka re ni hkyem ton da ya ra ai. La-ma hpaga magam hkrang gaba hku rem ai rai jang hka lu jak hten n hten ai lam ni mung atsom jep yu ra ai. Ndai bo u hpe go akyu namshum su ai bo ushat yo ra ai majo, hkum grai gahtet ai, shing rai hka grai lu lu ai, udi langai mi na hka rong shadang go u a hkum na hka rong shadang a 10% daram rai nga ai. La-ma u ganu ni hka lani mi n mu lu jang udi di shadang 30% daram yom mat chye ai, dai rai 20~30 ya daram rai jang she gaungui rai bai lu awai la ai. Gahtet gatsi shadang nau tso jang ntsa hkalap hku nbung nsa jashon bang nna sharai shanyem la na, shing n rai nbung layit hte sharai shanyem la na.

  Udi di sai u ganu ni hpe go wanpu atu asan di gatsut kau nna htong shachyi ton ya ra ai, wanpu hten mat jang mung lawan wan galai kau ra ai.

  Ushat go di hpro dat 15% rong ai bo nambat 2 ushat yo na, upra hpe udi di ai ulong de rong kau ai hpang, u ni udi di ai lam hta hkan nna yo rem ladat mung sharai la ra sai. Uro gok mi hta gade daram rong na go u ni a hkrang gaji gaba hpe yu ra ai, nau rong shalo kau jang u nkau mi ushat atsom n mu hta sha nna nkau go gaji nkau go gaba rai mat ai, nau bai rong jashau kau jang mung shara hte ushat lahpot la-ma rai mat ai. Ndai bo u go laban bat 20 daram ko nna udi di wa sai, ndai laman hta udi shau nna loi gaji ai. Laban bat 20~22 daram re hpe go ushat lahkring nhkring jat bang ya ra sia, wanpu mung laban bat mi hta hkying hkum chyen mi daram htong shachyi jat nna, lani mi hta hkying hkum 16 daram du hkra rai na, wanpu htong shachyi ton ya ai aten je na magang udi di shadang mung grau tso jat wa sai. Hpa majo wanpu htong shachyi ton ya jang udi grau di a ta nga yang: Dai go u ni wanpu lago htoi ai hpe mu jang bonu ko gashing ya nna mayat chye gatu wa ai majo, nli grau kam shalun nna udi mung grau di nga ai. Dai majo udi lo di shangun na matu, u ni gaba galon wa magang wanpu sharam shachyi ton ya nna akyu namshum su ai bo ushat yo ra ai. Udi di shadang 60% a lahta de du jang, akyu namshum grau su ai bo nambat 1 ushat bai galai yo ra sai, laban bat 29 daram hta udi di shadang 80% daram du nga ai, ndai aten go udi di laman hta grau ahkyak ai aten re majo grai gon shaja ra ai, shaloi she udi di aten grau na nna udi mung grau gaja ai, la-ma ndai aten hta dat n wa mat jang udi di shadang mung yom mat wa chye ai.

  (Bai matut hti ga) (Zinghtung Ma Sam)