Hpungtang hpaji ginra景颇科普

Hkauna ko chyahkan hte hkatsu rem na ladat

养螃蟹和虾子的方法

时间:2017-11-03 16:45:14 来源:德宏团结报

  Hkauna ko chyahkan rem ai go ndai lahkong masum ning laman hta Gyangsu (江 苏), launing hkan shong chyam hpang wa ai rem lu rem sha magam gaja langai rai nga ai. Chyahkan rem ai hte nga rem ai ladat go ganoi maren sha re, rai yang chyahkan go chye hprong pru mat mat rai nga ai, chyahkan n lu hprong pru na matu hka n-gup gade nde zing-ren chyinghka galo bang ton ra ai hta n-ga, hkauna grup-yin hku shimyenwa (石棉瓦) zon re ni hte nhkpan chyip chyip kum shinggrup kau ra ai. Nhpan kum ai shaloi shimyenwa hpe aga de mida laman 10~20 daram htu lup nna, hkauna maga de loi nhkrem la la di kum ra ai, nhpan tso de yom htum mida laman 50 a lahta de rai ra ai.

  Hkauna mu mi hta chyahkan gasha 6000~10000 daram dat bang ai rai yang, shata 5 daram rem ai htom hkui la ten du jang, mu mi hta chyahkan kungkyin 10~20 daram lu la mai ai. Hkauna ko go dut sha na bo chyahkan hpe madung dat nna rem ra ai, ndai bo chyahkan nli kungkyin mi ko chyahkan gasha 30 daram rong ai rai nna, hkauna mu mi hta chyahkan gasha 20000 daram dat bang ra ai, shaloi hkui la ten du jang chyahkan langai mi hke 100 jan lu du nna, mu mi hta kungkyin 20~60 daram lu la mai ai, tso dik htum go mu mi hta kungkyin 50 jan pyi lu la mai ai.

  Chyahkan nli hpe hkauna ko dat bang na shong e lusonhtung, shing n rai gaumungsongya hte tsing gashin kau ra ai, shaloi she chyahkan a hkum hkan kap ai sha lom shingtai ni hte ana ni hpe sat lajang kau lu ai majo chyahkan grau gaba lawan ai. Chyahkan go hpa hkrup hpa sha ai bo hka jahkai re, rai yang lo malong go shingtai shingko ni hpe grau kam sha ma ai, dai majo chyahkan hpe go shan rai ni hte namlo namlap gayau gaya di nna jo ra ai. Chyahkan shat gade daram jo nahte ahkying aten masat ton nna shara mi hta sha gat jo na, lani mi hta 2~3 lang gat jo ra ai. Chyahkan go shana hkan lusha tam sha hkom nna sham e rai jang bansa to nga ai, chyahkan shat go shana de jo ai hpe madung dat ra ai, shana de gat jo ai chyahkan shat hpe go lani mi na chyahkan shat a 60%~70% daram rai ra ai. Shata 3~4 laman hta chyahkan li dat bang ai shaloi, namlo namlap lo jo ra ai hta n-ga, loi shau shau di nna lahkring nhkring bai jo jo di ra ai. Shata 7~8 laman hta go chyahkan ni shat grau lu sha ai rai nna grau gaba lawan ai ahkyak laman rai nga ai, ndai laman hta mung namlo namlap lo jo ra ai, hka tsingdu, kahkum re ni lo gat jo yang mai ai. Shata 10 laman hta go chyahkan ni ndi di, chyahkan gasha kro pru wa ai aten re majo, ndai laman hta namshum rong ai bo shan rai ni lo jo nna, chyahkan ni hpe lawan mayat hpum gaba wa shangun na. (Ya na lang bai matut hti ga)